台語之美─心適的台灣話
dang hong-zing (董峰政)
《加州聖地牙哥台美基金會專題演講：2003 年 4 月 20 日于聖地牙哥台灣中心》

起鼓─踏話頭

一、音樂性： 七聲八調；變調

七聲八調

台語上大的特色是「八音七調」加上「變調」，所以用台語講話親像咧唱歌。因為，台語本身有伊的「音樂性」。比如講：
「佇溪邊」、「五千箍」就是「Do-Mi-So」的調。
「買新褲」、「討分數」就是「So-Mi-Do」的調。
「阿公食西瓜」就是「Mi-So Do-Mi-So」的調。
「我加汝三歲」就是「So-Mi-So Mi-Do」的調。
「八音七調」有峘(高平聲)、有下(下降聲)、有牽長(舒聲) 、有收束(促聲)等種種的音調，是非常豐富的音樂性語言。比如講：

白鴒鷥
白鴒鷥，捙畚箕，捙到溪仔墘，跋一倒，抾著二仙錢。
一仙買餅送大姨，一仙儉起來好過年。

甜粿過年
甜粿過年，發粿發錢，
包仔包金，菜頭粿食點心。

打馬膠 (da-ma-ga)
打馬膠黏著跤，叫阿爸買豬跤，
豬跤箍仔焄爛爛，枵鬼囡仔流喙瀾。

二、趣味性
台語本身是一種心適、趣味的語言，咱會當隨時用身驅邊的物件，對四周圍的親友、同事，講一寡感謝的話、祝福的話、心適的話，甚至創治的話。

講好話，祝福的話：

三、古老性─讀書音、入聲字、古漢字

台語保留了一千三百外冬前唐朝時代的官話，「讀書音」佮「入聲字」，以及「古漢字」，這佇語言學來講，是人類一種足寶貴的文化遺產。下面分別做說明 ：

入聲字

江雪 柳宗元
千山鳥飛絕，萬徑人縱滅，
孤舟簑笠翁，獨釣寒江雪。
【註】絕 zuat、滅 bhiat、
攏是屬於跤 (腳) 擋手擋的入聲字。

滿江紅 岳飛
怒髮衝冠，憑欄處，瀟瀟雨歇。
抬望眼，仰天長嘯，壯懷激烈。
三十功名塵與土，八千里路雲和月。
莫等閒，白了少年頭，空悲切。
靖康恥，猶未雪；
臣子恨，何時滅？
駕長車，踏破賀蘭山缺。
壯志飢餐胡虜肉？
笑談渴飲匈奴血。
待從頭，收拾舊山河，朝天闕。

四、文學性

有關台語的文學性，我用流行佇台灣民間數百年的「褒歌」來簡單證明台語是有文學的。褒歌又被稱呼做「台灣國風」，伊的特色是「七字仔」、「四句聯」、「全鬥句」，哪親像詩經的「十五國風」一般。比如：

半暝月娘
半暝月娘入紗窗，偏偏照我守空房，關窗將月緊緊送，送去隔壁照別人。

佮君約佇
佮君約佇甘蔗溝，蔗葉拍結做號頭，夭壽啥人共阮敨，害阮一人淪一溝。

門口一欉
門口一欉相思欉，相思病落毋知人；先生來看講無望，搭心來看好噹噹。

阿君卜轉
阿君卜轉阮卜留，留君神魂用紙包。等君去後提來敨，日日見君佇阮兜。

一尾好魚
一尾好魚毋食釣，走到江中尾直搖，掠汝袂著予汝笑，堅心做網拋甲著。

千里路途
千里路途無嫌遠，見面親像蜜攪糖，苦毋時鐘行倒轉，好話未講天先光。

五、思想性
俗語是一個族群生活經驗的智慧，亦是一個族群的風土民情佮思想信仰的縮影，反映迄個 族群的個性，透過祖先的「古早話」予咱會當了解本土文化的源頭。台灣的俗語，除了充滿人生智慧佮哲理外，另外配合語言本身的音樂性，使得台灣俗語到處看會著、聽會著「押韻」的旋律，若像一首短短優美的歌詩。

．目珠看粿，跤踏著火。
．九頓米糕無上算，一頓冷糜抾去囥。
．人情世事陪甲夠，無鼎佮無灶。
．卜去烏影，毋去吊鼎。
．大工一下指，小工磨半死。
．食糖算頓，食水久長。
．緊紡無好紗，緊嫁無好大家。
．不孝新婦三頓燒，有孝查囝路上搖。
．花佇別人欉，某佇別人房。
．做雞著筅，做人著反。
．有錢姑半路接，無錢姑喙那覕。
．一箸喙裡哺，一箸佇半路，一箸金金顧。

尾聲─收話尾

有人講語言干礁(只有)是一種溝通的工具而已，會通?好。即款的觀點，對家己的母語來講是相當偏差的。因為語言不止是「溝通的工具」，伊嘛是一種「思考的方式」、「感情的交流」、「族群的標記」、「文化的延續」、「尊嚴的維護」，會使講一個語言就是一個「族群的符號」。

演講者台語著作：

B01 母語的田園─台語文天地、B02 文學的肥底─台灣褒歌、B03 漢學仔冊選─昔時賢文、千金譜等、B04 喙舌佮筆尖─台語文寫作集、B05 古詩的啟蒙─千家詩、B06 母語的奶芳─台語囡仔歌、B07 祖先的智慧─全鬥句的台灣俗語、B08 歌詩的花園─唐詩三百首、B09 天兵佮天將─台語實用字典、B10 土地的聲嗽─台語歌仔冊、B11 母語的稻穗─學員創作集、B12空中的聲音─母語的田園等等。《e-mail：dang1109@yahoo.com.tw，
網站：demo1.nkhc.edu.tw/~t0015/ (鯤島台語文化園地)》