山崙仔的春天 (台語文版/初稿)
鄭德昌
﹝原稿寫於2003.4.15；董峰政翻譯並加註解2003.4.25﹞

春天的跤步恬恬仔來到山崙﹝註﹞
四界青翠充滿著活力
濟濟的野花當咧迎接春天的降落﹝註﹞
彎彎斡幹的小路嘛當咧拍莓，搶咧開花﹝註﹞

一棺一棺白甲像蝴蝶的細蕊花﹝註﹞
一棺一棺黃甲像鈴仔的細蕊花
一蕊一蕊豔麗紅的細蕊花
一簇一簇柑仔色、豬肝色…的細蕊花﹝註﹞

五蕊六蕊七蕊的花色
八蕊九蕊濟濟蕊的花草
徛挺挺共兩爿的細條路﹝註﹞
拽手﹝註﹞

山頂一片一片的松仔樹
落落滿四界松仔子
草埔的焦湖內舒著﹝註﹞
青中帶黃焦痡柔軟的草埔﹝註﹞ 汝我相約
歡喜向望﹝註﹞
佇五月間同齊來去山頂向春天報到
咱作伙行佇曠闊野外的小路頂

溫暖艷麗的日頭光
照光空中的淺藍
清涼的微風
吹著山間的笑聲

發現著花草茂盛的春天
看著捙跋反的生命力﹝註﹞
啊啊啊─啊啊啊─
咱不知不覺咧喝咻﹝註﹞

【通用拼音佮華語註解】
跤步：腳步。
恬恬仔： 靜靜的。
濟濟：數量甚多之意。
彎彎斡幹：彎彎曲曲。
拍莓：花朵綻放。
一棺：一串的意思。
白甲：白到某一種程度。(黃甲，同樣用法)。
一簇 ：一堆的意思。
徛挺挺：直立著，屹立不搖。
共兩爿：向兩旁(邊)。
拽手：揮手打招呼。
舒cu：舖設。
焦痡：瘦弱乾枯。
向望：盼望，希望。
捙跋反：忙碌不已；躍動不已。
喝咻： 大聲呼喊。歡呼。

【後記】
二ＯＯ三年四月二十日董峰政教授佇咱台灣中心，作了一場非常精采的台語文演講，予(ho)聖地牙哥的鄉親，對家己的母語文化，進一步的了解佮體會。倒轉台灣了後，董教授特別懷念聖地牙哥的鄉親，尤其是黃醫師全心投入台語文研究教學的精神，使伊特別感動。董教授會當將母語所講的話句，用伊熟似(sai)的漢 字表達出來，達到「喙(cui)舌佮筆尖合一」的境界。伊佇四月二十五日的來批內容如下：
「首先感謝汝佮諸位鄉親安排即場演講，予我有機會參逐家(dak-g?)結台語緣，真是難得。
即遍到美國三場的演講，予(ho)我上感動的是貴所在─聖地牙哥的演講，想袂(bhe)到逐家赫爾(hia-ni)熱情投入母語文化。看著海外鄉親的拍拚，予我佇(di) 推動母語的即條路，得著擱卡大的氣力(kui-lat)，多謝逐家。
特別是看著黃醫師全心投入台語的精神使人感動，不爾(li)過伊使用方式，比如造字佮拼音的方式，可能佮台灣的做法有淡薄出入，我個人感覺有一寡可惜，因為安爾做，到時佮台灣、美國其他地區，無法度結合。我個人認為學一套台灣目前主流的音標「通用拼音」 可能是真要緊的代誌。即遍卜(bhe)去美國進前，我才編好台灣第一本「台語實用字典(通用拼音字典)」，希望對音標一致化佮母語的推動有所幫助。即本字典我會用寄的，抑是請五月份轉來參加「台灣正名運動」的舊金山鄉親轉達，請汝佮黃醫師等指教。
暑假的時逐家若感覺有需要，我會使(e-sai)去美國參逐家作伙研究有關台語文化佮文學，上好是安排二工至三工左右，相信逐家對台語會進一步了解。當然若有即款的計劃，愛提早安排，因為佇台灣暑假我攏擔任訓練台語師資的工課，所以代誌有卡濟(z?)一點仔。上好是佮舊金山、洛杉磯作伙安排上理想。今年八月「全美同鄉會」卜佇洛杉磯舉辦夏令營，有計劃邀請我前往演講，是毋是利用即段時間上好勢。
汝批中附寄的「原野的春天」大作，我看了真感動，我想講共(g?)改寫做台語文，提供另外一種表達的方式，予卡濟人來鼻著滿山遍野百花盛開的芳味。汝看好無？擱聯絡，並請向大嫂、諸位鄉親請安問好，祝逐家平安順序(s?)。
----------dang h?ng-zing 佇台灣04/25/2003」