參加聖地牙哥台美基金會及台灣中心十週年慶感想
陳義達

人才儕儕﹝多多﹞的『台灣之子』聚集一堂，慶賀台灣中心成立十週年。唉呀，大自然美景聖地牙哥！吸引優秀菁英學者群集。被稱呼做『原住民』的福爾摩沙台灣鄉親，人人手牽手來建設屬家己的天地─台灣中心。十年光陰親像詩人新昌作家所描寫『綠色瞬間』：「許多散步在海灘上的日子將成為記憶」。會得佇海邊散步，欣賞日落日出美妙的景色，這咁呣是﹝這豈不是﹞人生最大的祝福？

佇回憶中，228血案的記憶，實在袂得通佮現實和平溫馨海灘美景相比，咱台灣蕃薯仔囝，享受每一刻美麗的景色，嘛常常誇口謳咾﹝讚美﹞台灣是美麗島，可惜佇遐﹝在那裡﹞代代受霸權佮各種政客蹧踏欺負？想看覓﹝想看看﹞咱祖先倚起佇大宇宙中，咱咁是有資格選擇和平、仁愛、公義佮自由的國家？想看覓創造萬物主宰，有創造單純可愛台灣人，藉著『蕃薯呣驚落土爛，只求籐葉代代湠』的精神，台灣人佇大宇宙中認真打拚，盼望咱所倚起的世間是佫佧會得和平共存的宇宙村。

看呀，聖地牙哥台灣人呀！咱有熱情，及洞察時代的眼光及智慧。咱欲帶真理、和平、仁愛、公義及真正自由來咱這個世界，咁呣是咧？真儕台灣鄉親攏會曉照顧家己，若踏入咱的台灣中心─咱的大家庭，無論是散步、跳舞、行棋、講古、彈琴、生活交談，攏是享受人生的每一刻。

早前人人活甲70~80歲，算是長歲壽，今仔日儕儕台灣人可活甲90歲、100歲，心神猷佫清醒、動作柳掠活潑、頭穀嘛清楚。

總是想著咱故鄉台灣，代代受著爛政客使弄善良台灣百姓，千萬台灣百姓失去向前活落去的信心，咱清清楚楚知影台灣早就是一個新佫主權獨立國家。可惡自私自利的白賊政客，想空想縫想欲將咱的心肝仔寶貝─台灣刈予﹝割給﹞霸權國家中共。

台灣是屬佇單純土直2,300百萬台灣百姓，任何霸權國家無資格干涉破壞福爾摩沙。聖地牙哥，台灣人大家庭─台灣中心兄弟姊妹啊！咱大家心連心、手牽手打拚建設屬家己的厝﹝家﹞。

十年前愛惜台灣的聖地牙哥原住民陳秋山、潘富鵬、黃獻麟、吳銘賢、范清亮及儕儕﹝很多﹞暗中奉獻家己的鄉親及背後的勇士，洗碗、掃土腳，清屎壆仔、搬椅桌、安排百種節目、彈琴拉曲，演布袋戲、搬電影、講日、台、中、英濫濫做伙的笑詼﹝笑話﹞，浪漫開講、生活交談，大家心神鬆快，滿心相疼相交陪，不清在你是博士博佮偌儕﹝多少﹞名聲，只要汝跳入聖地牙哥的台灣中心，大家就心神快樂，滿面春風，笑容溢出。

總是十年一瞬間就過去，咱永遠會記得曾操心打拚的義工朋友、范少達主任，張美女副主任及職員等，多謝恁勞心勞力，才有今仔日成果，感謝創設聖地牙哥台灣中心的無名英雄。

咱攏是正正純直的台灣人啊！大家著好膽，免驚，繼續打拚！